काठमाडौं। कर्णाली प्रदेश लोक सेवा आयोगले स्थानीय सेवाअन्तर्गत चौथो तहका विभिन्न पदमा १५१ जना कर्मचारी भर्नाका लागि आवेदन खुलाएको छ।

आयोगले २०८३ कात्तिक २४ गते सूचना प्रकाशित गर्दै प्रशासन, लेखा, कृषि, पशु सेवा, इन्जिनियरिङ र स्वास्थ्य सेवाका प्राविधिक तथा अप्राविधिक पदमा स्थायी पदपूर्तिका लागि आवेदन माग गरेको हो।

विज्ञापनअनुसार प्राविधिकतर्फ १०२ जना र अप्राविधिकतर्फ ४९ जना कर्मचारी माग गरिएको छ। यसमध्ये १४० पद खुला तथा समावेशी प्रतिस्पर्धाका लागि र ११ पद आन्तरिक अन्तरसेवा प्रतिस्पर्धाका लागि छुट्याइएका छन्।

आवश्यक योग्यता पुगेका उम्मेदवारले २०८३ मंसिर १४ गतेसम्म अनलाइन आवेदन दिन सक्नेछन्। नियमित म्यादमा आवेदन दिन नसक्नेले दोब्बर दस्तुर तिरेर मंसिर २१ गतेसम्म आवेदन दिन पाउनेछन्।

कुन पदमा कति कर्मचारी मागिएको छ?

आयोगले सार्वजनिक गरेको विज्ञापनअनुसार प्रशासन सहायक, लेखा सहायक, असिस्टेन्ट सब इन्जिनियर, अमिन, कृषि तथा पशु सेवाका प्राविधिक, अनमी र अहेब पदमा कर्मचारी माग गरिएको छ।

प्रशासन सहायकका ४८ पदमध्ये ११ पद आन्तरिक अन्तरसेवा प्रतिस्पर्धाका लागि हुन्। अन्य ३७ पद खुला तथा विभिन्न समावेशी समूहका लागि छुट्याइएका छन्।

आयोगले खस आर्य, महिला, दलित, आदिवासी जनजाति, पिछडिएको क्षेत्र, अपाङ्गता भएका व्यक्ति तथा मधेसी र मुस्लिम समुदायलगायतका लागि पनि विज्ञापनअनुसार पद छुट्याएको छ। सम्बन्धित समूहमा आवेदन दिन तोकिएको प्रमाणपत्र आवश्यक पर्नेछ।

कसले आवेदन दिन पाउँछन्?

आयोगका अनुसार पदअनुसार शैक्षिक योग्यता फरक–फरक तोकिएको छ।

प्रशासन सहायक: मान्यताप्राप्त शिक्षण संस्थाबाट एसएलसी, एसईई वा सोसरह उत्तीर्ण भएको हुनुपर्नेछ।

लेखा सहायक: गणित, ऐन स्रेस्ता वा ऐच्छिक लेखा विषय लिई एसएलसी, एसईई वा सोसरह उत्तीर्ण भएको हुनुपर्नेछ।

कृषि तथा पशु सेवाका प्राविधिक: सम्बन्धित विषयमा जेटीए तालिम प्राप्त गरेको वा सूचनामा तोकिएअनुसार एसएलसी वा टीएसएलसी उत्तीर्ण गरेको हुनुपर्नेछ।

असिस्टेन्ट सब इन्जिनियर: एसएलसी वा एसईई उत्तीर्ण गरी सम्बन्धित विषयमा तालिम प्राप्त गरेको, प्राविधिक शिक्षालयबाट सम्बन्धित विषयमा टीएसएलसी/एसईई कोर्स पूरा गरेको वा माध्यमिक तहमा सिभिल इन्जिनियरिङतर्फको प्राविधिक विषय अध्ययन गरेको हुनुपर्नेछ।

अमिन: गणित विषयसहित एसएलसी वा सोसरह उत्तीर्ण गरी सर्भे वा जियोमेटिक्स विषयमा कम्तीमा एक वर्षको तालिम लिएको हुनुपर्नेछ।

खानेपानी तथा सरसफाइ टेक्निसियन: एसएलसी/एसईई वा सोसरह उत्तीर्ण गरी खानेपानी तथा सरसफाइसम्बन्धी तालिम प्राप्त गरेको वा सम्बन्धित विषयमा दुई वर्षको अनुभव भएको हुनुपर्नेछ।

अनमी: मान्यताप्राप्त शिक्षण संस्थाबाट अनमी कोर्स उत्तीर्ण गरेको हुनुपर्नेछ।

अहेब: मान्यताप्राप्त शिक्षण संस्थाबाट सीएमए कोर्स उत्तीर्ण गरेको हुनुपर्नेछ।

ग्रेडिङ प्रणाली लागू भएपछि एसएलसी वा एसईई उत्तीर्ण गरेका उम्मेदवारले न्यूनतम जीपीए २ प्राप्त गरेको हुनुपर्नेछ।

आन्तरिक अन्तरसेवा प्रतिस्पर्धातर्फ भने कर्णाली प्रदेशभित्रका स्थानीय तहको स्थानीय सेवाको तहविहीन पदमा पाँच वर्ष सेवा अवधि पूरा गरेका र न्यूनतम शैक्षिक योग्यता पुगेका कर्मचारीले आवेदन दिन सक्नेछन्।

उमेर कति हुनुपर्छ?

आवेदन दिन चाहने उम्मेदवारको उमेर २०८३ मंसिर १४ गतेसम्म कम्तीमा १८ वर्ष पूरा भएको हुनुपर्नेछ।

सामान्यतर्फ ३५ वर्ष ननाघेको, महिला तथा अपाङ्गता भएका उम्मेदवारको हकमा ४० वर्ष ननाघेको र स्वास्थ्य सेवाको हकमा ४५ वर्ष ननाघेको हुनुपर्नेछ।

संघीय निजामती सेवा, प्रदेश निजामती सेवा र स्थानीय सेवाका बहालवाला स्थायी कर्मचारीको हकमा भने सूचनाअनुसार उमेरको सीमा लागू हुने छैन।

आवेदन कहिलेसम्म दिने? शुल्क कति लाग्छ?

कसरी आवेदन दिने?

इच्छुक उम्मेदवारले कर्णाली प्रदेश लोक सेवा आयोगको आधिकारिक अनलाइन प्रणालीमार्फत आवेदन दिनुपर्नेछ।

अनलाइन आवेदन दिने आधिकारिक वेबसाइट

उम्मेदवारले वेबसाइटमा गएर आवश्यक व्यक्तिगत तथा शैक्षिक विवरण भरी सम्बन्धित विज्ञापन र पद छनोट गर्नुपर्नेछ।

आवेदनसँगै नागरिकताको प्रमाणपत्रको अगाडि र पछाडिको भाग, शैक्षिक प्रमाणपत्र, आवश्यक तालिम तथा अनुभवका कागजात र समावेशी समूहमा आवेदन दिनेले सम्बन्धित प्रमाणपत्र अपलोड गर्नुपर्नेछ।

फाराम पेस गरेपछि अनलाइन वालेटबाट वा तोकिएको बैंकमार्फत आवेदन शुल्क बुझाउन सकिनेछ।

परीक्षा कहिले र कहाँ हुन्छ?

अप्राविधिकतर्फ प्रारम्भिक परीक्षा हुने पदहरूको प्रथम चरणको लिखित परीक्षा २०८३ पुस २६ गते दिउँसो १ बजे तोकिएको छ।

दोस्रो चरणको लिखित परीक्षा र अन्य पदहरूको परीक्षा मिति आयोगले पछि सार्वजनिक गर्नेछ।

परीक्षा केन्द्र वीरेन्द्रनगर, सुर्खेत तोकिएको छ।

आवेदन, पाठ्यक्रम र अन्य विस्तृत जानकारीका लागि आयोगको आधिकारिक वेबसाइट ppsc.karnali.gov.np हेर्न सकिन्छ। थप जानकारीका लागि आयोगको सम्पर्क नम्बर ०८३–५९०३०६ मा सम्पर्क गर्न सकिनेछ।