फूल तथा नर्सरी व्यवसाय गर्नुहुन्छ? सरकारी तालिमका लागि आवेदन खुल्यो

जीविको २०८३ असोज ४ गते १०:३८

काठमाडौं — राष्ट्रिय फलफूल बाली विकास केन्द्र, कीर्तिपुरले पुष्प तथा नर्सरी व्यवसायमा संलग्न व्यक्तिका लागि ३ दिने कृषकस्तरीय तालिम सञ्चालन गर्ने भएको छ। केन्द्रले “पुष्प नर्सरी लक्षित उत्पादन तथा बजारीकरण क्षमता अभिवृद्धि कृषक स्तरीय तालिम” मा सहभागी हुन इच्छुक नर्सरी धनी तथा पुष्प व्यवसायीबाट आवेदन माग गरेको हो।

केन्द्रले आर्थिक वर्ष २०८३/८४ को वार्षिक स्वीकृत कार्यक्रमअन्तर्गत तालिम सञ्चालन गर्न लागेको जनाएको छ। तालिममा विशेषगरी पुष्प तथा नर्सरी व्यवसायको उत्पादन र बजारीकरणसम्बन्धी क्षमता अभिवृद्धिमा केन्द्रित गरिने सूचनामा उल्लेख छ।

तालिम कहाँ र कहिले हुन्छ?

तालिम काठमाडौं उपत्यकामा सञ्चालन हुनेछ। केन्द्रका अनुसार तालिम सञ्चालनको सम्भावित समय २०८३ मंसिरको पहिलो साता रहेको छ। तालिमको अवधि ३ दिन हुनेछ।

कसले आवेदन दिन सक्छ?

सूचनाअनुसार पुष्प व्यवसायी तथा नर्सरी सञ्चालन गरिरहेका नर्सरी धनी/व्यवसायीले आवेदन दिन सक्नेछन्।

इच्छुक व्यक्तिले केन्द्रले उपलब्ध गराएको Google Form भरेर वा सूचनामा रहेको QR Code स्क्यान गरेर २०८३ असोज ३० गतेभित्र आवेदन पेश गर्नुपर्नेछ।

अनलाइन आवेदन फाराम खोल्नुहोस्

आवेदन परेका व्यक्तिमध्ये संक्षिप्त सूचीमा छनोट हुने सहभागीलाई केन्द्रले सम्पर्क गर्ने जनाएको छ।

दैनिक तथा भ्रमण भत्ता पनि पाइने

तालिममा सहभागी हुने व्यक्तिलाई नेपाल सरकारको नियमानुसार दैनिक तथा भ्रमण भत्ता आयोजकले उपलब्ध गराउने सूचनामा उल्लेख छ। तर त्यसबाहेक अन्य भत्ता उपलब्ध नगराइने केन्द्रले स्पष्ट पारेको छ।