पोखरा महानगरमा नगर प्रहरीको जागिर खुल्यो, १८ पदका लागि आवेदन आह्वान
काठमाडौं/पोखरा — पोखरा महानगरपालिकाले नगर प्रहरी सेवामा १८ जनाका लागि आवेदन आह्वान गरेको छ। महानगरपालिकाले सेवा करारमा पदपूर्ति गर्न नगर प्रहरी सहायक निरीक्षकतर्फ ४ जना र नगर प्रहरी जवानतर्फ १४ जना माग गरेको हो।
महानगरपालिकाको नगर कार्यपालिकाको कार्यालयले असोज ९ गते प्रकाशित गरेको सूचनाअनुसार योग्य उम्मेदवारलाई प्रतिस्पर्धात्मक परीक्षामार्फत छनोट गरिनेछ। आवेदन २०८३ असोज १२ गतेदेखि असोज २६ गतेसम्म दिन सकिनेछ। अन्तिम दिन सार्वजनिक बिदा परेमा त्यसपछि कार्यालय खुलेको दिन कार्यालय समयभित्र आवेदन बुझाउन सकिने सूचनामा उल्लेख छ।
कुन पदमा कति जना मागिएको छ ?
नगर प्रहरी सहायक निरीक्षक — ४ जना
- खुला — २ जना
- महिला — १ जना
- आदिवासी/जनजाति — १ जना
नगर प्रहरी जवान — १४ जना
- खुला — ८ जना
- महिला — २ जना
- आदिवासी/जनजाति — २ जना
- दलित — १ जना
- आर्थिक रूपमा विपन्न खस आर्य — १ जना
शैक्षिक योग्यता र उमेर
नगर प्रहरी सहायक निरीक्षकका लागि मान्यता प्राप्त विश्वविद्यालयबाट कम्तीमा प्रमाणपत्र तह वा सोसरह उत्तीर्ण गरेको हुनुपर्नेछ। आवेदन दिने अन्तिम मितिसम्म उम्मेदवारको उमेर १८ वर्ष पूरा भई २४ वर्ष ननाघेको हुनुपर्नेछ।
बहालवाला नगर प्रहरीका हकमा पुरुषको उमेर ३५ वर्ष र महिलाको ४० वर्ष ननाघेको हुनुपर्ने व्यवस्था छ। नेपाल सरकारको सुरक्षा निकायबाट सेवा निवृत्त व्यक्तिले सहायक निरीक्षकमा आवेदन दिँदा उमेर ४० वर्ष ननाघेको हुनुपर्नेछ।
नगर प्रहरी जवानका लागि कम्तीमा कक्षा १० वा सोसरह उत्तीर्ण गरेको हुनुपर्नेछ। उम्मेदवारको उमेर १८ वर्ष पूरा भई २३ वर्ष ननाघेको हुनुपर्नेछ। सुरक्षा निकायबाट सेवा निवृत्त व्यक्तिको हकमा उमेर ३७ वर्ष ननाघेको हुनुपर्ने उल्लेख छ।
शारीरिक मापदण्ड पनि तोकियो
दुवै पदका पुरुष उम्मेदवारको उचाइ कम्तीमा ५ फिट २ इन्च, छाती ३१–३३ इन्च र तौल कम्तीमा ५० किलो हुनुपर्नेछ। महिला उम्मेदवारको उचाइ कम्तीमा ५ फिट र तौल कम्तीमा ४२ किलो हुनुपर्नेछ।
उम्मेदवारको आँखाको दृष्टि माइनस २ वा प्लस २ भन्दा बढी कमजोर नभएको हुनुपर्ने र नेपाल सरकारको सरकारी अस्पतालबाट निरोगिताको प्रमाणपत्र प्राप्त गरेको हुनुपर्नेछ।
त्यस्तै, उम्मेदवार नेपाली नागरिक हुनुपर्ने, नैतिक पतन देखिने फौजदारी अभियोगमा सजाय नपाएको, राजनीतिक दलको सदस्य नरहेको, मानवअधिकार तथा मानवीय कानुन उल्लंघनमा सजाय नपाएको र भविष्यमा सरकारी सेवाका लागि अयोग्य ठहरिने गरी सेवाबाट बर्खास्त नभएको हुनुपर्नेछ।
आवेदन कहाँ र कसरी दिने ?
इच्छुक उम्मेदवारले पोखरा महानगरपालिका नगर कार्यपालिकाको कार्यालयमा रहेको दरखास्त संकलन केन्द्रमा आवेदन बुझाउनुपर्नेछ। आवेदन फाराम महानगरपालिकाको वेबसाइट pokharamun.gov.np बाट डाउनलोड गर्न सकिने सूचनामा उल्लेख छ।
आवेदनका साथ उम्मेदवारले आफैंले प्रमाणित गरेका निम्न कागजात पेश गर्नुपर्नेछ:
- नेपाली नागरिकताको प्रमाणपत्रको प्रतिलिपि
- न्यूनतम शैक्षिक योग्यताको प्रमाणपत्रको प्रतिलिपि
- अनुभवको प्रमाणपत्र, लागू हुने भएमा
- हालसालै खिचिएको पासपोर्ट साइजको फोटो ३ प्रति
- समावेशी समूहमा आवेदन दिनेले सम्बन्धित समूह खुल्ने कागजात
- सुरक्षा निकायबाट सेवा निवृत्त उम्मेदवारले सेवा निवृत्त प्रमाणपत्र
आवेदन दस्तुर कति ?
नगर प्रहरी सहायक निरीक्षकका लागि परीक्षा दस्तुर ५०० रुपैयाँ र नगर प्रहरी जवानका लागि ३०० रुपैयाँ तोकिएको छ।
एकभन्दा बढी समावेशी समूहमा आवेदन दिने उम्मेदवारले सहायक निरीक्षकतर्फ प्रत्येक थप समूहका लागि १५० रुपैयाँ र जवानतर्फ प्रत्येक थप समूहका लागि १०० रुपैयाँ अतिरिक्त शुल्क बुझाउनुपर्नेछ।
दस्तुर पोखरा महानगरपालिकाको राष्ट्रिय वाणिज्य बैंकमा रहेको खाता नं. ३०२०१००३०१०१०००२, शीर्षक नं. १४२२४ मा जम्मा गरी सक्कल भौचर आवेदन फारामसँग संलग्न गर्नुपर्नेछ।
कसरी हुन्छ छनोट ?
उम्मेदवारको छनोटका लागि पहिलो चरणमा शारीरिक तन्दुरुस्ती र विस्तृत स्वास्थ्य परीक्षण हुनेछ। त्यसपछि लिखित परीक्षा र अन्तर्वार्ता लिइनेछ।
शारीरिक तन्दुरुस्ती तथा लिखित परीक्षाको पाठ्यक्रम नेपाल प्रहरी सेवा, जनपद प्रहरी समूहअन्तर्गत सम्बन्धित प्रहरी सहायक निरीक्षक र प्रहरी जवान पदका लागि तोकिएको पाठ्यक्रमअनुसार हुने महानगरपालिकाले जनाएको छ।
महानगरपालिकाले २०८३ असोज २७ गतेलाई सम्पर्क मिति तोकेको छ। परीक्षा मितिसम्बन्धी जानकारी सोही सम्पर्क मितिमा प्रकाशित गरिनेछ।
म्याद नाघेर आएका वा आवश्यक प्रक्रिया र कागजात पूरा नभएका आवेदनमाथि कुनै कारबाही नहुने महानगरपालिकाले स्पष्ट पारेको छ। थप जानकारीका लागि पोखरा महानगरपालिका नगर कार्यपालिकाको कार्यालयमा सम्पर्क गर्न सकिनेछ।
