रुपन्देहीमा १५ प्रकारका निःशुल्क सीपमूलक तालिम, आवेदन खुला
२० वर्ष उमेर पुगेका लुम्बिनी प्रदेशका नेपाली नागरिकले आवेदन दिन सक्ने, अधिकांश तालिममा २०–२० जना सहभागी
रुपन्देही — लुम्बिनी प्रदेश सरकारले युवालाई व्यावसायिक तथा सीपमूलक तालिम प्रदान गर्न विभिन्न १५ प्रकारका निःशुल्क तालिमका लागि आवेदन खुलाएको छ।
लुम्बिनी प्रदेश सरकारको उद्योग, पर्यटन तथा यातायात मन्त्रालयअन्तर्गत उद्योग, वाणिज्य तथा उपभोक्ता हित संरक्षण निर्देशनालयको घरेलु तथा साना उद्योग कार्यालय, रुपन्देहीले आर्थिक वर्ष २०८३/०८४ को स्वीकृत वार्षिक कार्यक्रमअनुसार तालिम सञ्चालन गर्न आवेदन माग गरेको हो।
कार्यालयले २०८३ असोज ८ गते पहिलो पटक सूचना प्रकाशित गर्दै तालिम लिन इच्छुक व्यक्तिले सूचना प्रकाशित भएको मितिले १५ दिनभित्र आवश्यक कागजातसहित आवेदन दिनुपर्ने जनाएको छ।
कुन-कुन तालिम सञ्चालन हुँदैछन्?
कार्यालयको सूचनाअनुसार निम्न तालिम सञ्चालन गरिनेछन्:
- एडभान्स ब्युटिसियन तालिम — २० जना
- नेपाली कुकिङ कुक तालिम — २० जना
- मन्टेश्वरी तालिम (३९० घण्टा, सीप परीक्षणसहित) — २० जना
- युवाहरूलाई ड्राइभिङ तालिम — २० जना
- युवाहरूलाई बारिस्ता तथा बेकरी तालिम — २० जना
- ब्युटिसियन, ड्राइभिङ तथा बारिस्ता तालिम — महिलालक्षित, सिद्धार्थनगर नगरपालिका, भैरहवा — २०/२० जना
- चप्पल-जुत्ता बनाउने तालिम — २० जना
- ड्राइभिङ, पञ्चेबाजा तथा कम्प्युटर तालिम — महिलालक्षित, बुटवल उपमहानगरपालिका — २०/२० जना
- एकल महिलाका लागि घरमै धूप बनाउने तालिम — २० जना
- मोबाइल फोन रिपेयर तालिम (३९० घण्टा, सीप परीक्षणसहित) — २० जना
- ब्याग बनाउने तालिम — २० जना
- बेकरी बनाउने तालिम — २० जना
- महिलाका लागि नेल आर्ट तालिम — २० जना
- बुटिक तालिम — २० जना
- डिजिटल मार्केटिङ तालिम — २० जना
तालिमको अवधि स्वीकृत पाठ्यक्रममा तोकिएबमोजिम हुने कार्यालयले जनाएको छ।
कसले आवेदन दिन सक्छ?
सूचनाअनुसार आवेदक २० वर्ष उमेर पूरा भएको लुम्बिनी प्रदेशमा स्थायी बसोबास गर्ने नेपाली नागरिक हुनुपर्नेछ। युवा लक्षित कार्यक्रमका लागि भने १८ वर्ष पूरा भई ४० वर्ष ननाघेको हुनुपर्ने उल्लेख छ।
आवेदनसँग नेपाली नागरिकता प्रमाणपत्रको प्रतिलिपि र हालसालै खिचिएको २ प्रति फोटो पेश गर्नुपर्नेछ।
त्यस्तै, दलित वर्ग तथा स्थान लक्षित तालिमका लागि सम्बन्धित वर्ग वा स्थान खुल्ने प्रमाणित कागजात पनि पेश गर्नुपर्नेछ।
सूचनामा उल्लेख भएका तालिममध्ये आफूले लिन चाहेको तालिमको विषय स्पष्ट खुलाएर आवेदन दिनुपर्नेछ।
एडभान्स ब्युटिसियन तालिमका लागि भने आधारभूत तालिम प्राप्त गरेको प्रमाणपत्र आवश्यक पर्नेछ। बुटिक तालिममा पनि आधारभूत सिलाइ-कटाइ तालिम प्राप्त व्यक्तिलाई प्राथमिकता दिइने सूचनामा उल्लेख छ।
आवेदन फाराम कहाँ पाइन्छ?
निवेदन तथा स्वःघोषणा फाराम घरेलु तथा साना उद्योग कार्यालयको वेबसाइटबाट डाउनलोड गरेर भर्न सकिनेछ।
वेबसाइट: csirupandehi.lumbini.gov.np
स्थान तोकिएका तालिमका लागि सम्बन्धित स्थानीय तहको सिफारिससहित आवेदन पेश गर्नुपर्ने कार्यालयले जनाएको छ।
छनोट कसरी हुन्छ?
तालिममा सहभागी छनोट अन्तर्वार्ताका आधारमा गरिनेछ। अन्तर्वार्ताको मिति र स्थान पछि अर्को सूचनामार्फत जानकारी गराइनेछ।
तालिममा सहभागी हुन कुनै शुल्क लाग्ने छैन।
तालिम लिन इच्छुक व्यक्तिले आफूलाई उपयुक्त तालिम छनोट गरी आवश्यक कागजात तयार गरेर तोकिएको समयभित्र आवेदन दिन सक्नेछन्।
One thought on “रुपन्देहीमा १५ प्रकारका निःशुल्क सीपमूलक तालिम, आवेदन खुला”