काठमाडौँ — इजरायल रोजगारीका लागि आवेदन दिएका केयरगिभर आवेदकहरूले पेस गरेका तालिम प्रमाणपत्रमाथि वैदेशिक रोजगार विभागले छानबिन सुरु गरेको छ। तालिम नै नलिई प्रमाणपत्र बनाउने, अपूरो तालिमलाई पूरा भएको देखाउने वा रकम लिएर नक्कली प्रमाणपत्र बिक्री हुने गरेको गुनासो आएपछि विभागले प्रमाणपत्रको सत्यता परीक्षण गर्न थालेको हो।

इजरायलका दीर्घकालीन स्याहार केन्द्रहरूमा सहायक कामदार/केयरगिभरका रूपमा नेपाली कामदार पठाउने प्रक्रिया सरकार–सरकारबीचको जी–टु–जी प्रणालीअन्तर्गत अघि बढाइएको हो। वैदेशिक रोजगार विभागले नेपाल सरकार र इजरायल सरकारबीचको श्रम सम्झौताअनुसार १ हजार ४६४ जना नेपाली कामदार छनोट गर्न आवेदन आह्वान गरेको हो।

विभागको २०८३ भदौ २३ गतेको सूचनाअनुसार १ हजार १३२ जना महिला र ३३२ जना पुरुष कामदारको माग छ। छनोट भएका कामदारको मासिक तलब ६ हजार ४४३ दशमलव ८५ इजरायली मुद्रा अर्थात् करिब ३ लाख २३ हजार नेपाली रुपैयाँ हुनेछ।

नेपाली रुपैयाँमा उल्लेख गरिएको रकम अनुमानित हो र विनिमय दरअनुसार फरक पर्छ। यसबाट खाना, आवास, बीमा तथा करलगायत नियमानुसारका खर्च कट्टा हुने भएकाले हातमा आउने रकम कम हुनेछ।

सूचनाअनुसार क्याम्ब्रिज अपस्किल अंग्रेजी परीक्षा अद्यावधिक भइरहेको कारण परीक्षा दिनुपर्ने आवेदकले २०८३ असोज ५ गते अर्थात् २१ सेप्टेम्बर २०२६ देखि परीक्षा दिन सक्नेछन्। अंग्रेजी भाषा परीक्षा शुल्क रु. ५ हजार उल्लेख गरिएको छ।

यस प्रक्रियामा सहभागी हुन अंग्रेजी भाषा परीक्षामा तोकिएको न्यूनतम मापदण्ड पूरा गर्नुपर्ने व्यवस्था थियो। वैदेशिक रोजगार विभागको FERMS पोर्टलमा प्रकाशित सर्तअनुसार आवेदकले Reading A2, Writing A1, Listening A2 र Speaking B1 तहको English Up Skill Test प्रमाणपत्र पेस गर्नुपर्ने उल्लेख छ।

विभागका अनुसार तालिम प्रदायक संस्थाहरूबाट प्राप्त विवरण अहिले अद्यावधिक तथा प्रमाणीकरण भइरहेको छ। केही संस्थाले छोटो अवधिमै अस्वाभाविक रूपमा धेरै जनालाई तालिम दिएको विवरण पठाएको पाइएपछि त्यस्ता विवरणलाई विशेष रूपमा हेरिएको बताइएको छ। विभागले तालिम अवधि, प्रमाणपत्र जारी मिति, प्रशिक्षार्थीको नाम, ठेगाना, संस्थाको मान्यता र तालिमको वास्तविकता मिलान गरेर प्रमाणपत्र जाँच गरिरहेको छ।

इजरायल रोजगारीका लागि नर्सिङ, एएनएम वा सीएमए पृष्ठभूमि नभएका आवेदकले मान्यता प्राप्त संस्थाबाट कम्तीमा तीन महिनाको केयरगिभर तालिम लिएको हुनुपर्छ। FERMS पोर्टलमा राखिएको सर्तअनुसार आवेदक २५ वर्ष पूरा भई ४५ वर्ष ननाघेको, कम्तीमा १.५ मिटर उचाइ र ४५ किलो तौल भएको, तथा कक्षा १२ वा सोसरहको योग्यता हासिल गरी मान्यता प्राप्त संस्थाबाट केयरगिभिङसम्बन्धी कम्तीमा तीन महिनाको तालिम लिएको हुनुपर्ने व्यवस्था छ।

विभागले झुटा विवरण पेस गर्ने आवेदक, तालिम नदिई प्रमाणपत्र जारी गर्ने संस्था वा अपूरो तालिमलाई पूरा भएको देखाएर प्रमाणपत्र दिने व्यक्ति/संस्थाविरुद्ध कानुनअनुसार कारबाही हुने चेतावनी दिएको छ। विभागले सामाजिक सञ्जालमा “इजरायल जान तालिम खुल्यो”, “छोटो समयमा प्रमाणपत्र”, “नाम निकालिदिन्छु” जस्ता प्रचार–प्रसारमाथि पनि निगरानी बढाएको जनाएको छ।

यसअघि पनि इजरायल रोजगारीका लागि आवेदन दिने क्रममा मान्यता नभएका संस्थाबाट जारी भएका तालिम प्रमाणपत्र प्रयोग भएको भन्दै सयौँ आवेदन रद्द भएका थिए। Jibiko मा यसअघि प्रकाशित समाचारमा पनि इजरायल केयरगिभर प्रक्रिया संवेदनशील भएकाले बिचौलिया, नक्कली प्रमाणपत्र र अपुष्ट सामाजिक सञ्जाल प्रचारबाट सावधान रहन आग्रह गरिएको थियो।

आवेदकले के कुरामा ध्यान दिने ?

इजरायल केयरगिभर प्रक्रिया सरकारी जी–टु–जी प्रक्रिया हो। त्यसैले “नाम निकालिदिन्छु”, “लटरी मिलाइदिन्छु”, “भाषा परीक्षा पास गराइदिन्छु”, “तालिम नलिए पनि प्रमाणपत्र बनाइदिन्छु” भन्ने दाबीमा विश्वास गर्नु जोखिमपूर्ण हुन सक्छ।

आवेदकहरूले आफ्नो सबै कागजात सक्कली र आफ्नै विवरणअनुसार मात्र पेस गर्नुपर्छ। तालिम प्रमाणपत्र, शैक्षिक प्रमाणपत्र, अंग्रेजी परीक्षा, प्रहरी रिपोर्ट, राहदानी र स्वास्थ्यसम्बन्धी कागजातमा झुटो विवरण भेटिए आवेदन रद्द हुने मात्र होइन, कानुनी कारबाहीसमेत हुन सक्छ।

विभागले आधिकारिक सूचना वैदेशिक रोजगार विभागको वेबसाइट, FERMS पोर्टल र विभागका आधिकारिक माध्यमबाट मात्र हेर्न आग्रह गर्दै आएको छ। सामाजिक सञ्जालमा देखिएको विज्ञापन, तालिम केन्द्रको प्रचार वा बिचौलियाको आश्वासनका आधारमा पैसा तिर्नु हुँदैन।