काठमाडौँ । वैदेशिक रोजगारीबाट फर्किने नेपाली नागरिकले अब निश्चित सर्त पूरा गरेमा थप एक थान मोबाइल फोन र ६५ इन्चसम्मको एक थान टेलिभिजन भन्सार महसुल छुटमा ल्याउन पाउने भएका छन्।

नेपाल सरकारको आर्थिक विधेयक २०८३ मा श्रम स्वीकृति लिएर वैदेशिक रोजगारीमा गई फर्केका नेपाली नागरिकले ल्याउन पाउने निजी प्रयोगका वस्तुमा महसुल छुट दिने व्यवस्था गरिएको छ।

व्यवस्थाअनुसार लगातार कम्तीमा ६ महिना विदेशमा बसेर फर्केका नेपाली यात्रुले आफूले प्रयोग गरिरहेको मोबाइल फोनबाहेक थप एक थान सेलुलर मोबाइल फोन ल्याउन पाउनेछन्।

त्यस्तै, लगातार कम्तीमा १२ महिना विदेशमा बसेर फर्केका यात्रुले ६५ इन्चसम्मको एक थान टेलिभिजन महसुल छुटमा ल्याउन पाउनेछन्। यो सुविधा अभिलेख रहने गरी एक पटकका लागि मात्र उपलब्ध हुने उल्लेख छ।

यसको अर्थ, विदेशबाट फर्कने सबै यात्रुले स्वतः मोबाइल र टिभी छुटमा ल्याउन पाउने होइनन्। यो सुविधा श्रम स्वीकृति लिएर वैदेशिक रोजगारीमा गएका र तोकिएको अवधि पूरा गरी फर्केका नेपाली नागरिकका लागि हो।

भन्सार छुट पाए पनि यात्रुले आवश्यक सामान भन्सारमा घोषणा गर्नुपर्ने हुन्छ। नियमभन्दा बढी परिमाण वा तोकिएको सर्त नपुगेको अवस्थामा प्रचलित कानुनअनुसार भन्सार महसुल लाग्न सक्छ।

के-के सुविधा छ?

६ महिना वैदेशिक रोजगारी गरेर फर्केका नेपालीले आफूले प्रयोग गरिरहेको मोबाइलबाहेक थप एक थान मोबाइल ल्याउन पाउने।

१२ महिना वैदेशिक रोजगारी गरेर फर्केका नेपालीले ६५ इन्चसम्मको एक थान टेलिभिजन ल्याउन पाउने।

यो सुविधा एक पटकका लागि मात्र उपलब्ध हुने।

श्रम स्वीकृति र विदेशमा बसेको अवधिसम्बन्धी प्रमाण आवश्यक पर्ने।

सामान ल्याउँदा भन्सार घोषणा र प्रक्रिया पूरा गर्नुपर्ने।

विदेशबाट फर्किँदै हुनुहुन्छ भने सामान किन्नुअघि पछिल्लो भन्सार नियम, श्रम स्वीकृति विवरण र आवश्यक कागजातबारे बुझेर मात्र तयारी गर्नु उपयुक्त हुन्छ।