बब्लु टी: जब मेहेनतको रङ कडा हुन्छ, तब सफलताको स्वाद गज्जब हुन्छ !
के छ त्यस्तो एक कप चियामा ?
मन मस्तिष्कमा स्फूर्ति जगाइदिने जादु छ एक कप चियामा, दोस्ती यारीलाई मजबुत बनाउने तागत छ एक कप चियामा, एक से एक आइडियाहरू फुराउने सामर्थ्य छ एक कप चियामा । त्यति मात्र कहाँ हो र देश विकास कसरी गर्ने भनेर योजना नै बनाउन सक्ने जोस छ एक कप चियामा । बस्, रङ कडा अनि स्वाद गज्जब भएको चिया हुनुपर्यो ।
त्यसैले त भनिएको होला – एक कप चिया र असल साथीले समाधान गर्न नसक्ने कुनै समस्या नै छैन।
बिरगंजको आदर्शनगरमा रहेको बब्लु टी पुग्नुभयो भने थाहा हुन्छ, एक कप चियाको तागत कति छ भनेर । बिहान ६ बजे आदर्शनगरको सडक पेटी बब्लु टीका पारखीहरूले भरिन्छ । यस्तो लाग्छ यो कुनै चिया पसल नभएर सेवाग्राहीको भिड लाग्ने सरकारी कार्यालय हो । एक कप चिया त बहाना हो, यहाँ नियमित आउने ग्राहकले २-३ कप चिया नखाई त उठ्दै उठ्दैनन् ।
बब्लु शर्मा भर्खर २९ वर्षका भए तर उनले चलाउने बब्लु टी आजभन्दा २५ वर्ष अगाडिदेखिको चिया पसल हो । उनका बुवा राम निवास शर्माले छोरा बब्लुको नाम राखेर चिया पसल चलाउने गर्थे । त्यसबेला पचास पैसाको एक कप चिया बेच्ने गर्थे राम निवासले, अहिले कपको ३५ रुपैयाँ पर्छ । छोरा बब्लुले अहिले बुवालाई पालो दिन सक्ने भएका छन् । बितेको २५ वर्षमा समय, स्वाद अनि संख्या एकनाशले बढिरहे ।
बब्लुको दैनिकी बिहान ६ बजेदेखि राती ८ बजेसम्म यही पसलमा स्वादिलो चिया बनाएर बित्ने गर्छ । बब्लु टी यस्तो ठाउँ हो जहाँ मानिसहरू बिहानै गूड् मर्निङ भन्दै चियाको चुस्की लगाउन भेला हुन्छन् अनि साँझ बब्लुको हातको चिया खाएर गूड् नाइट भन्दै छुट्टिन्छन् ।
जति मीठो बब्लुले बनाउने चिया छ, उनको मेहेनतको रङ पनि उस्तै कडा छ । दैनिक एक हजार कपसम्म चिया बेच्ने गर्छन् बब्लु । दैनिक १५ घण्टा खटिएर करिव ५ सय जनालाई चिया पिलाउँदा मान्छे नथाक्ने भन्ने त हुँदैन तर पनि उनको अनुहारमा उस्तै उज्यालो हुन्छ, ओठमा न्यानो आतिथ्यताको मुस्कान कायम नै हुन्छ । चियाकै कारण बिरगंजमा हजारौँको साथी भएका छन् बब्लु । रोजगारीका लागि भन्दै खाडीमा हन्डर, ठक्कर खानुपरेको छैन उनलाई ।
बिरगंजको उखरमाउलो गर्मीमा चिया पकाउन ब्यस्त बब्लुलाई सोधें- दैनिक १५-१६ घण्टासम्म कसरी सकिन्छ काम गर्न ? एक दिन होइन, दुई दिन होइन.. त्यो पनि वर्षौं वर्षदेखि ?
बब्लु भन्छन्, “मैले अहिलेसम्म ठूलो सपना त देखेको छैन, तर आफ्नो कामलाई कहिल्यै सानो पनि सोचेको छैन । बुवाले सुरु गर्नुभएको कामलाई अगाडि बढाउने जिम्मेवारी सम्हाल्दै छु, हजारौं भगवानरुपी ग्राहकको साथ पाएको छु, परिवारको जीविका राम्रोसँग चलेको छ अनि समाजमा आत्मसम्मानले बाँच्न पाएको छु । कोही मान्छेले चिया बेचेरै यति धेरै कुराहरू पाउँछ भने हरेक दिन उसलाई काम गर्न कति जाँगर लाग्छ होला”
हेर्नुहोस्, दैनिक १५ घण्टा खटिएर एक हजार कपसम्म चिया बेच्ने बिरगंज-आदर्शनगरका बब्लु शर्माको भिडियो कथा:
