कुवेतबाट नेपाल जान चाहने र नेपालबाट कुवेत आउन चाहने यात्रुहरूका लागि जजिरा एयरवेजले आगामी ५ अप्रिल २०२६ देखि साउदी अरबको दमामलाई ट्रान्जिट बनाएर कुवेत-काठमाडौँ उडान पुनः सुरु गर्ने घोषणा गरेको छ। कुवेत र नेपालबीच सिधा उडानमा देखिएको प्राविधिक कठिनाइलाई सम्बोधन गर्दै जजिरा एयरवेजले यात्रुहरूका लागि नयाँ र सिर्जनशील ‘बस–टू–फ्लाइट’ (Bus-to-Flight) सेवा घोषणा गरेको हो। यो सेवा ५ अप्रिलबाट सुरु हुनेछ। एयरलाइन्सका अनुसार आगामी ५ अप्रिल २०२६ देखि साउदी अरबको दमामलाई ट्रान्जिट बनाएर कुवेत–काठमाडौँ उडान पुनः सञ्चालन हुने भएको हो।

कसरी हुन्छ यात्रा? (प्रक्रिया)

यो नयाँ व्यवस्थाअनुसार कुवेतबाट नेपाल जाने यात्रुहरूले कुवेत अन्तर्राष्ट्रिय विमानस्थल जानु पर्ने छैन। यात्रुहरूले कुवेतको मिस्रफ इन्टरनेशनल फेयरग्राउण्ड (Mishref Fairground) स्थित हल नम्बर ८ मा पुगेर आफ्नो सामान (Baggage) बुझाउनु पर्नेछ र त्यहीँबाट बोर्डिङ पास प्राप्त गर्नेछन्।

त्यसपछि जजिराकै विशेष वातानुकूलित बसमार्फत यात्रुहरूलाई साउदी बोर्डर हुँदै दमामको किङ्ग फहद अन्तर्राष्ट्रिय विमानस्थल पुर्‍याइनेछ। दमामबाट जजिराको विमानमार्फत काठमाडौँका लागि सिधा उडान हुनेछ। नेपालबाट कुवेत फर्कने यात्रुहरूको हकमा पनि सोही प्रक्रिया (काठमाडौँ–दमाम उडान र दमाम–कुवेत बस सेवा) लागु हुने एयरलाइन्सले जनाएको छ।

भिसा र कागजी प्रक्रिया

साउदी अरब प्रवेशका लागि आवश्यक पर्ने ट्रान्जिट वा प्रवेश अनुमति (Entry Permit) को समन्वय जजिरा एयरवेज स्वयंले गर्ने भएको छ। यसले गर्दा यात्रुहरूले व्यक्तिगत रूपमा साउदी भिसा निकाल्नुपर्ने झन्झट हटेको छ। साउदी बोर्डरमा हुने ‘एक्जिट स्ट्याम्प’ र अन्य अध्यागमन प्रक्रियामा एयरलाइन्सले सहजीकरण गर्नेछ।

भाडादर र समय

• टिकट दर: कुवेतबाट नेपालका लागि करिब ३२० केडी (KD) र नेपालबाट कुवेतका लागि करिब ३९० देखि ४०० केडी (KD) सम्म तोकिएको छ (माग र मिति अनुसार यो दर केही फरक हुन सक्छ)।

• समय सीमा: बसको यात्रा र बोर्डरको प्रक्रियालाई मध्यनजर गर्दै यात्रुहरूलाई उडान समयभन्दा करिब १७ घण्टा अगावै मिस्रफस्थित चेक-इन काउन्टरमा उपस्थित हुन सिफारिस गरिएको छ।

किन यो सेवा महत्त्वपूर्ण छ?

कुवेतको टर्मिनल-५ (T5) बाट हुने उडानहरूमा आएको प्राविधिक परिवर्तनका कारण हजारौँ नेपाली श्रमिकहरू महँगो र लामो ट्रान्जिट भएका अन्य एयरलाइन्स प्रयोग गर्न बाध्य थिए। जजिराको यो ‘हाइब्रिड’ सेवाले सस्तो भाडामा काठमाडौँ आउजाउ गर्ने ढोका पुनः खोलेको छ। यसले विशेषगरी वैदेशिक रोजगारीमा रहेका नेपाली कामदारहरूको समय र खर्च दुवै बचत गर्न ठुलो मद्दत पुर्‍याउने अपेक्षा गरिएको छ।