डिजिटल मार्केटिङ, कटाई–सिलाई र मन्टेश्वरी तालिमका लागि आवेदन खुला
दाङ — लुम्बिनी प्रदेश सरकारअन्तर्गत घरेलु तथा साना उद्योग कार्यालय, दाङले विभिन्न सीपमूलक तालिममा सहभागी हुन इच्छुक व्यक्तिबाट आवेदन माग गरेको छ।
कार्यालयले आर्थिक वर्ष २०८३/८४ को स्वीकृत वार्षिक कार्यक्रमअन्तर्गत कन्टेन्ट क्रिएटिङ/भिडियोग्राफी तथा डिजिटल मार्केटिङ, कटाई–सिलाई र आधारभूत मन्टेश्वरी तालिम सञ्चालन गर्न लागेको हो।
सूचनाअनुसार कन्टेन्ट क्रिएटिङ, भिडियोग्राफी र डिजिटल मार्केटिङ तालिम पाठ्यक्रमअनुसार सञ्चालन हुनेछ। सहभागी संख्या सूचनामा २०/२० जना उल्लेख गरिएको छ। तालिम घोराही, तुलसीपुर उपमहानगरपालिका र लमही नगरपालिका क्षेत्रमा सञ्चालन हुने उल्लेख छ।
त्यस्तै कटाई–सिलाई तालिममा २० जना सहभागी गराइनेछ। यो तालिम घरेलु तथा साना उद्योग कार्यालय, दाङमा सञ्चालन हुनेछ।
आधारभूत मन्टेश्वरी तालिम ३९० घण्टाको हुनेछ र यसमा सीप परीक्षणसमेत समावेश गरिएको छ। यस तालिममा २० जना सहभागी गराइनेछ र तालिम घरेलु तथा साना उद्योग कार्यालय, दाङमा सञ्चालन हुनेछ।
योग्यता के चाहिन्छ?
आवेदक १८ वर्ष पूरा भएको नेपाली नागरिक हुनुपर्नेछ। साथै लुम्बिनी प्रदेशमा स्थायी बसोबास भएको हुनुपर्नेछ। दाङ जिल्लामा स्थायी बसोबास भएकालाई प्राथमिकता दिइने सूचनामा उल्लेख छ।
आधारभूत मन्टेश्वरी तालिमका लागि भने न्यूनतम SLC वा SEE उत्तीर्ण हुनुपर्नेछ।
आवेदनसँग के बुझाउने?
आवेदनसँग नेपाली नागरिकताको प्रतिलिपि, सम्बन्धित तालिम यसअघि नगरेको स्वघोषणा, आवश्यक शैक्षिक योग्यताको प्रमाणपत्रको प्रतिलिपि तथा तालिमपछि उद्यम/व्यवसाय सञ्चालन गर्ने प्रतिबद्धता पत्र बुझाउनुपर्नेछ।
कहाँ र कसरी आवेदन दिने?
आवेदन घरेलु तथा साना उद्योग कार्यालय, दाङमा बुझाउन सकिन्छ।
कार्यालयले [email protected] मार्फत पनि आवेदन दिन सकिने जनाएको छ।
आवेदन फाराम कार्यालयको वेबसाइट तथा फेसबुक पेजबाट प्राप्त गर्न सकिने सूचनामा उल्लेख छ।
सहभागीका लागि आवेदन बढी परेमा अन्तर्वार्ताबाट छनोट गरिनेछ। अन्तर्वार्ताको मिति पछि जानकारी गराइनेछ।
तालिमपछि सीप परीक्षण हुने तालिमका हकमा सहभागीले सीप परीक्षणमा अनिवार्य रूपमा सहभागी हुनुपर्ने व्यवस्था छ।
सूचना २०८३ असोज ७ गते पहिलोपटक प्रकाशित भएको हो र इच्छुक व्यक्तिले सूचना प्रकाशित भएको मितिले १५ दिनभित्र आवेदन दिनुपर्नेछ।
थप जानकारी
थप जानकारीका लागि घरेलु तथा साना उद्योग कार्यालय, दाङको सूचना अधिकारी वा कार्यालयमा सम्पर्क गर्न सकिनेछ। सूचनामा कार्यालयको वेबसाइट csiodang.lumbini.gov.np उल्लेख गरिएको छ।
