लोपोन्मुख आदिवासी जनजाति तथा दलित विद्यार्थीलाई ३०० विद्युतीय चुलो, अनलाइन आवेदन खुला

जीविको २०८३ असोज ५ गते ६:४१

काठमाडौं — सरकारले काठमाडौं उपत्यकामा अध्ययनरत लोपोन्मुख आदिवासी जनजाति तथा दलित समुदायका ३०० जना विद्यार्थीलाई विद्युतीय चुलो उपलब्ध गराउने भएको छ।

ऊर्जा, जलस्रोत तथा सिँचाइ मन्त्रालयअन्तर्गतको वैकल्पिक ऊर्जा प्रवर्द्धन केन्द्र (AEPC) ले सूचना जारी गर्दै योग्य विद्यार्थीबाट विद्युतीय चुलोका लागि माग तथा आवेदन आह्वान गरेको हो।

केन्द्रले हाल काठमाडौं उपत्यकामा देखिएको एलपी ग्यास उपलब्धतासम्बन्धी समस्यामा केही राहत पुर्‍याउनुका साथै नेपालमै उत्पादित स्वच्छ ऊर्जाको खपत बढाउन र विद्युतीय चुलोको प्रयोग प्रवर्द्धन गर्न यो कार्यक्रम ल्याइएको जनाएको छ।

कसले आवेदन दिन पाउँछन्?

सूचनाअनुसार काठमाडौं बाहिरबाट काठमाडौं उपत्यकामा आई घर भाडामा लिएर स्नातक वा स्नातकोत्तर तहमा अध्ययन गरिरहेका लोपोन्मुख आदिवासी जनजाति तथा दलित समुदायका विद्यार्थीले आवेदन दिन सक्नेछन्।

कार्यक्रमअन्तर्गत कुल ३०० विद्यार्थीलाई विद्युतीय चुलो उपलब्ध गराइनेछ।

आवेदन दिने अन्तिम मिति

केन्द्रले सूचना २०८३ असोज ३ गते प्रकाशित गरेको हो।

आवेदन बुझाउने अन्तिम समय २०८३ असोज ८ गते दिउँसो २ बजेसम्म तोकिएको छ।

कसरी आवेदन दिने?

इच्छुक विद्यार्थीले वैकल्पिक ऊर्जा प्रवर्द्धन केन्द्रको अनलाइन प्रणालीमार्फत फाराम भर्नुपर्नेछ।

अनलाइन आवेदन लिंक:
https://mis.aepc.gov.np:1415/

अनलाइन फाराम भरेपछि सूचनामा उल्लेख गरिएका आवश्यक कागजात पनि सोही प्रणालीमा अपलोड गर्नुपर्नेछ। फाराम मात्र भरेर आवश्यक प्रमाणपत्र तथा कागजात पेश नगरेका विद्यार्थीको आवेदन छनोट प्रक्रियामा समावेश नहुने केन्द्रले स्पष्ट पारेको छ।

के–के कागजात चाहिन्छ?

आवेदनका साथ निम्न कागजात पेश गर्नुपर्नेछ:

नेपाली नागरिकताको प्रमाणपत्रको प्रतिलिपि
अध्ययनरत शिक्षण संस्थाको सिफारिसपत्र र विद्यार्थी परिचयपत्रको प्रतिलिपि
लोपोन्मुख आदिवासी जनजाति वा दलित वर्ग खुल्ने परिचयपत्रको प्रतिलिपि वा सम्बन्धित निकायको सिफारिसपत्र

कसलाई छनोटमा प्राथमिकता?

केन्द्रका अनुसार सम्बन्धित निकाय वा स्थानीय तहबाट विपन्नता खुल्ने सिफारिस पेश गरेका विद्यार्थी तथा सरकारी वा सामुदायिक शिक्षण संस्थामा अध्ययनरत विद्यार्थीलाई छनोटका क्रममा प्राथमिकता दिइनेछ।

शिक्षण संस्थाबाट आवश्यक सिफारिस लिनुपर्ने विद्यार्थीका लागि सिफारिसपत्रको ढाँचा वैकल्पिक ऊर्जा प्रवर्द्धन केन्द्रको वेबसाइट www.aepc.gov.np बाट डाउनलोड गर्न सकिने सूचनामा उल्लेख छ।

पहिले नै विद्युतीय चुलो पाएकाले फेरि पाउँदैनन्

वैकल्पिक ऊर्जा प्रवर्द्धन केन्द्रबाट यसअघि नै विद्युतीय चुलो प्राप्त गरिसकेका विद्यार्थीले पुनः माग गरेमा त्यस्तो आवेदन स्वतः खारेज हुने सूचनामा उल्लेख छ।