इटहरीमा १४० जनालाई सात विषयमा निःशुल्क सीप तालिम, दैनिक भत्तासमेत

जीविको २०८३ साउन १९ गते १४:११

इटहरीमा १४० जनालाई सात विषयमा निःशुल्क सीप तालिम, दैनिक खाजा भत्तासमेत

**इटहरी।** नेपाल सरकार, श्रम, रोजगार तथा सामाजिक सुरक्षा मन्त्रालयअन्तर्गत राष्ट्रिय व्यावसायिक प्रशिक्षण प्रतिष्ठानको व्यावसायिक प्रशिक्षण केन्द्र, इटहरीले सात विषयमा १४० जनाका लागि निःशुल्क सीपमूलक तालिम सञ्चालन गर्ने भएको छ।

केन्द्रले टेलर, कुक, सहायक ब्युटिसियन, एडभान्स कटाइ–सिलाइ, बिल्डिङ इलेक्ट्रिसियन, बारिस्टा र केयर गिभर विषयमा तालिम लिन इच्छुक नेपाली नागरिकबाट आवेदन माग गरेको हो। प्रत्येक विषयमा २० जनाका दरले कुल १४० जना सहभागी छनोट गरिनेछ।

इच्छुक व्यक्तिले २०८३ भदौ २ गतेसम्म कार्यालय समयभित्र व्यावसायिक प्रशिक्षण केन्द्र, इटहरीमा आवेदन बुझाउनुपर्नेछ। उक्त दिन सार्वजनिक बिदा परेमा त्यसको भोलिपल्टसम्म आवेदन दिन सकिने सूचनामा उल्लेख छ।

## कुन तालिममा कति जनाले अवसर पाउने?

बेसिक कटाइ–सिलाइ, कुक, सहायक ब्युटिसियन, एडभान्स कटाइ–सिलाइ, बिल्डिङ इलेक्ट्रिसियन र बारिस्टा तालिम व्यावसायिक प्रशिक्षण केन्द्र, इटहरीमा सञ्चालन हुनेछन्। केयर गिभर तालिम भने केन्द्र वा केन्द्रले तोकेको स्थानमा सञ्चालन हुन सक्नेछ।

## आवेदनका लागि आवश्यक कागजात

आवेदकले भरिएको आवेदन फारामसँगै नेपाली नागरिकताको प्रमाणपत्रको प्रतिलिपि, दुई प्रति पासपोर्ट साइजको फोटो तथा शैक्षिक योग्यताका प्रमाणपत्रको प्रतिलिपि बुझाउनुपर्नेछ।

एडभान्स कटाइ–सिलाइ तालिमका लागि आवेदन दिने व्यक्तिले मान्यता प्राप्त संस्थाबाट सम्बन्धित विषयको बेसिक तालिम लिएको प्रमाणपत्रसमेत पेस गर्नुपर्नेछ। आवेदनसँग बुझाइएका सम्पूर्ण कागजातका सक्कल प्रमाणपत्र अन्तर्वार्तामा लिएर आउनुपर्ने सूचनामा उल्लेख छ।

तालिमका लागि आवेदकको उमेर कम्तीमा १८ वर्ष पूरा भएको र ४५ वर्ष ननाघेको हुनुपर्नेछ।

## अन्तर्वार्ताको समयतालिका

प्रशिक्षार्थीको छनोट अन्तर्वार्ताका माध्यमबाट गरिनेछ। अन्तर्वार्ता बिहान १० बजेदेखि दिउँसो ४ बजेसम्म व्यावसायिक प्रशिक्षण केन्द्र, इटहरीमा हुनेछ।

– बेसिक कटाइ–सिलाइ: २०८३ भदौ ४ गते
– कुक: २०८३ भदौ ६ गते
– सहायक ब्युटिसियन: २०८३ भदौ ८ गते
– एडभान्स कटाइ–सिलाइ: २०८३ भदौ १० गते
– बिल्डिङ इलेक्ट्रिसियन: २०८३ भदौ १२ गते

बारिस्टा र केयर गिभर तालिमको अन्तर्वार्ता मिति आवेदन दिने समय सकिएपछि तोकिनेछ।

छनोटसम्बन्धी सूचना केन्द्रको सूचना पाटी, वेबसाइट तथा फेसबुक पेजमार्फत सार्वजनिक गरिनेछ। तालिम सञ्चालन हुने मिति पनि अन्तर्वार्ताको नतिजा प्रकाशनसँगै जानकारी गराइनेछ।

## दैनिक ५० रुपैयाँ खाजा भत्ता

तालिममा सहभागी प्रशिक्षार्थीलाई दैनिक ५० रुपैयाँका दरले खाजा भत्ता उपलब्ध गराइनेछ। तालिम दैनिक छ घण्टा सञ्चालन हुनेछ।

तालिम सुरु भएको तीन दिनभित्र उपस्थित नहुने प्रशिक्षार्थीको स्थानमा वैकल्पिक उम्मेदवारलाई सहभागी गराइनेछ। उचित कारणबिना बीचमै तालिम छोड्ने प्रशिक्षार्थीको विवरण सरकारी अभिलेखमा राखी भविष्यमा केन्द्रबाट सञ्चालन हुने तालिममा सहभागी नगराइने सूचनामा उल्लेख छ।

महिला, अपाङ्गता भएका व्यक्ति, दलित, आदिवासी जनजाति, सहिद तथा बेपत्ता परिवार, एकल महिला, पिछडिएको क्षेत्रलगायत लक्षित र सीमान्तकृत समुदायका आवेदकलाई प्राथमिकता दिइनेछ।

आवेदन तथा थप जानकारीका लागि व्यावसायिक प्रशिक्षण केन्द्र, इटहरीमा सम्पर्क गर्न वा केन्द्रको वेबसाइट **vcitahari.gov.np** तथा फेसबुक पेज **Vocational Training Centre, Itahari** हेर्न सकिनेछ। म्याद नाघेर आएका वा आवश्यक प्रक्रिया पूरा नभएका आवेदनमाथि कारबाही नहुने केन्द्रले जनाएको छ।

हेर्नुहोस् सुचना