कृषि सामग्री कम्पनीमा २३ कर्मचारीका लागि आवेदन खुल्यो, एसईईदेखि स्नातकसम्मलाई अवसर

काठमाडौं । कृषि सामग्री कम्पनी लिमिटेडले विभिन्न पदमा खुला तथा समावेशी प्रतिस्पर्धाबाट २३ जना कर्मचारीका लागि आवेदन खुला गरेको छ। कम्पनीको प्रधान कार्यालय, काठमाडौंले २०८३ असार १९ गते सूचना प्रकाशित गर्दै सहायक प्रबन्धकदेखि सहायक कृषि प्राविधिकसम्मका पदमा अनलाइन दरखास्त माग गरेको हो।

कम्पनीका अनुसार लोक सेवा आयोगको सहमति र पदपूर्ति समितिको निर्णयअनुसार रिक्त पदहरूमा पदपूर्ति प्रक्रिया अघि बढाइएको हो। खुला तथा समावेशी प्रतिस्पर्धाका लागि आवेदन दिने उम्मेदवारहरूले कम्पनीको अनलाइन दरखास्त प्रणालीमार्फत आवेदन दिनुपर्नेछ।

कुन–कुन पदमा कति जनाको माग?

कम्पनीले खुला तथा समावेशी प्रतिस्पर्धाबाट निम्न पदहरूमा आवेदन माग गरेको छ।

कुल पद संख्या: २३

आवश्यक शैक्षिक योग्यता

सहायक प्रबन्धक प्रशासनका लागि मान्यता प्राप्त शिक्षण संस्थाबाट कुनै पनि विषयमा स्नातक तह वा सो सरह उत्तीर्ण हुनुपर्नेछ।

सहायक प्रबन्धक लेखाका लागि व्यवस्थापन, वाणिज्य शास्त्र वा व्यापार प्रशासनमा स्नातक तह उत्तीर्ण हुनुपर्नेछ। अर्थशास्त्र, गणित, तथ्याङ्क शास्त्र वा जनप्रशासनमध्ये कुनै एक मुख्य विषय लिएर स्नातक गरेकाले पनि आवेदन दिन सक्नेछन्।

सहायक प्रबन्धक बाली विकासका लागि कृषि विज्ञान विषयमा स्नातक तह वा सो सरह उत्तीर्ण हुनुपर्नेछ।

वरिष्ठ सहायक पदका लागि प्रमाणपत्र तह, कक्षा १२ वा सो सरह उत्तीर्ण हुनुपर्नेछ। वरिष्ठ सहायक कम्प्युटरका लागि कम्प्युटर विज्ञान, सूचना प्रविधि वा कम्प्युटर इन्जिनियरिङ विषयमा प्रमाणपत्र तह, कक्षा १२ वा सो सरह उत्तीर्ण हुनुपर्नेछ। वरिष्ठ सहायक कृषि प्राविधिकका लागि कृषि विज्ञान विषय लिएर प्रमाणपत्र तह, कक्षा १२ वा सो सरह उत्तीर्ण हुनुपर्नेछ।

सहायक पदका लागि एसईई वा सो सरह उत्तीर्ण हुनुका साथै लोक सेवा आयोगबाट सञ्चालित सम्बन्धित पूर्वयोग्यता परीक्षा उत्तीर्ण भई प्रमाणपत्र प्राप्त गरेको हुनुपर्नेछ।

सहायक कम्प्युटरका लागि कम्प्युटर विषय लिएर एसईई वा सो सरह उत्तीर्ण, वा एसईई/सो सरह उत्तीर्ण गरी दर्ता भएको संस्थाबाट कम्तीमा ६ महिनाको कम्प्युटर तालिम लिएको हुनुपर्नेछ।

सहायक कृषि प्राविधिकका लागि कृषि विषय लिएर एसईई वा टीएसएलसी उत्तीर्ण, वा एसईई/सो सरह उत्तीर्ण गरी कम्तीमा १ वर्षको जे.टी.ए. कृषि विज्ञान तालिम लिएको हुनुपर्नेछ।

कसरी आवेदन दिने?

उम्मेदवारले कृषि सामग्री कम्पनी लिमिटेडको अनलाइन दरखास्त प्रणाली https://vacancy.kscl.gov.np मार्फत आवेदन दिनुपर्नेछ।

अनलाइन आवेदन दिँदा उम्मेदवारले हालसालै खिचेको पासपोर्ट साइजको फोटो, नेपाली नागरिकताको प्रमाणपत्र, शैक्षिक योग्यताका प्रमाणपत्र, आवश्यक तालिम तथा अनुभवका कागजात र समावेशी समूहबाट आवेदन दिने भए सम्बन्धित समावेशी प्रमाणपत्र अपलोड गर्नुपर्नेछ।

दरखास्त फाराम भरेपछि परीक्षा दस्तुर खल्ती वा Connect IPS मार्फत बुझाउन सकिने सूचनामा उल्लेख छ।

आवेदन दिने अन्तिम मिति

सामान्य दस्तुरमा आवेदन दिने अन्तिम मिति २०८३ साउन ७ गते तोकिएको छ। दोब्बर दस्तुर तिरेर २०८३ साउन १४ गतेसम्म आवेदन दिन सकिनेछ।

परीक्षा दस्तुर कति?

सहायक प्रबन्धक पदका लागि परीक्षा दस्तुर रु. १,२००, वरिष्ठ सहायक पदका लागि रु. ७०० र सहायक पदका लागि रु. ५०० तोकिएको छ।

एउटै उम्मेदवारले एउटै पदमा एकभन्दा बढी समूहमा आवेदन दिने भए सहायक प्रबन्धकका लागि थप रु. ४००, वरिष्ठ सहायकका लागि थप रु. २०० र सहायक पदका लागि थप रु. १५० बुझाउनुपर्नेछ।

उमेर हद

अधिकृत तृतीय श्रेणीका पदका लागि उम्मेदवार २१ वर्ष पूरा भई ३५ वर्ष ननाघेको हुनुपर्नेछ। सहायक श्रेणीका पदका लागि १८ वर्ष पूरा भई ३५ वर्ष ननाघेको हुनुपर्नेछ। महिला तथा अपाङ्गता भएका व्यक्तिहरूको हकमा ४० वर्षसम्म उमेर हद तोकिएको छ।

परीक्षा कसरी हुन्छ?

सबै पदको लिखित परीक्षा लोक सेवा आयोगबाट सञ्चालन हुनेछ। परीक्षा केन्द्र काठमाडौं उपत्यकामा रहनेछ। लिखित परीक्षाको कार्यक्रम लोक सेवा आयोगले निर्धारण गरेपछि प्रकाशित गरिने कम्पनीले जनाएको छ।

परीक्षामा लिखित परीक्षा, आवश्यक पदका लागि प्रयोगात्मक परीक्षा, मामिला प्रस्तुतीकरण, अन्तर्वार्ता तथा पाठ्यक्रममा तोकिएका अन्य विधिहरू रहनेछन्। विज्ञापित पदहरूको पाठ्यक्रम कम्पनीको वेबसाइट www.kscl.gov.np बाट प्राप्त गर्न सकिनेछ।

थप जानकारीका लागि कृषि सामग्री कम्पनी लिमिटेड, प्रधान कार्यालय, काठमाडौंमा कार्यालय समयभित्र सम्पर्क गर्न सकिने सूचनामा उल्लेख छ।