राष्ट्रिय समाचार समिति (रासस)ले विभिन्न तह र सेवामा कर्मचारी पदपूर्तिका लागि सूचना प्रकाशित गरेको छ। राससले २०८३ असार १२ गते प्रकाशित सूचनामार्फत २० पदका लागि आन्तरिक, खुला तथा समावेशी प्रतियोगितात्मक लिखित परीक्षा र २३ पदका लागि कार्यक्षमता मूल्याङ्कनद्वारा बढुवा सम्बन्धी आवेदन माग गरेको हो।

राससका अनुसार प्रतियोगितात्मक लिखित परीक्षाबाट स्थायी पदपूर्ति गर्न लोक सेवा आयोगबाट २०८३ असार ९ गते सहमति प्राप्त भएको छ। खुला तथा समावेशी पदमा योग्य नेपाली नागरिकले आवेदन दिन सक्नेछन् भने आन्तरिक प्रतियोगिता र बढुवा सम्बन्धी पदमा राससमा कार्यरत योग्य कर्मचारीले आवेदन दिन पाउनेछन्।

प्रतियोगितात्मक परीक्षाबाट २० पदमा आवेदन माग

राससले तह ४ देखि तह ८ सम्मका समाचार, अर्थ तथा प्रशासन र प्राविधिक समूहका पदमा आवेदन खुलाएको छ। तीमध्ये केही पद आन्तरिक प्रतियोगिता र बाँकी पद खुला तथा समावेशी समूहका लागि छन्।

यसरी प्रतियोगितात्मक परीक्षाबाट कुल २० पद पदपूर्ति हुनेछ। यसमध्ये ४ पद आन्तरिक प्रतियोगिता र १६ पद खुला तथा समावेशी समूहतर्फ छन्।

आवेदन दिने अन्तिम मिति

सामान्य दस्तुरसहित आवेदन दिने अन्तिम मिति २०८३ असार ३२ गते तोकिएको छ। दोब्बर दस्तुर तिरेर २०८३ साउन ७ गतेसम्म आवेदन दिन सकिनेछ। अन्तिम दिन सार्वजनिक बिदा परेमा कार्यालय खुलेको अर्को दिनसम्म आवेदन बुझाउन सकिने सूचनामा उल्लेख छ।

आवेदन कहाँ र कसरी दिने ?

दरखास्त फारम राससको वेबसाइट www.rssnepal.org.np/publication बाट डाउनलोड गर्न सकिनेछ। फारम भरेर हालसालै खिचिएको पासपोर्ट साइजको फोटो टाँसी आवश्यक कागजातसहित राष्ट्रिय समाचार समिति केन्द्रीय कार्यालय, भद्रकाली प्लाजा, काठमाडौंमा बुझाउनुपर्नेछ।

आवेदनसँगै शैक्षिक योग्यता, तालिम, अनुभव र नेपाली नागरिकताको प्रमाणपत्रको प्रतिलिपि संलग्न गर्नुपर्नेछ। समावेशी समूहमा आवेदन दिने उम्मेदवारले सम्बन्धित समूह खुल्ने आधिकारिक प्रमाणपत्र पनि बुझाउनुपर्नेछ। नेपालबाहिर अध्ययन गरेको शैक्षिक योग्यताको हकमा समकक्षता निर्धारण प्रमाणपत्र अनिवार्य छ।

परीक्षा दस्तुर राससको राष्ट्रिय वाणिज्य बैंक, थापाथली शाखाको चल्ती खाता नं. १४३०१००००२५७४००१ मा जम्मा गरी भौचर आवेदनसँगै संलग्न गर्नुपर्नेछ।

परीक्षा दस्तुर

तह ६ र ८ का पदका लागि परीक्षा दस्तुर रु. १,२०० तोकिएको छ। थप समावेशी समूहमा आवेदन दिएमा प्रत्येक थप समूहका लागि रु. ६०० थप दस्तुर लाग्नेछ।

तह ४ र ५ का पदका लागि परीक्षा दस्तुर रु. ६०० तोकिएको छ। थप समावेशी समूहका लागि प्रत्येक समूहमा रु. ३०० थप दस्तुर लाग्नेछ।

उमेर हद

तह ८ का पदमा आवेदन दिने उम्मेदवारले २०८३ असार ३२ गतेसम्म २१ वर्ष पूरा भई ४५ वर्ष ननाघेको हुनुपर्नेछ।

तह ६ का पदमा आवेदन दिन २१ वर्ष पूरा भई ३५ वर्ष ननाघेको हुनुपर्नेछ। महिला तथा अपाङ्गता भएका उम्मेदवारको हकमा उमेर हद ४० वर्ष तोकिएको छ।

तह ४ र ५ का पदमा आवेदन दिन १८ वर्ष पूरा भई ३५ वर्ष ननाघेको हुनुपर्नेछ। महिला तथा अपाङ्गता भएका उम्मेदवारको हकमा उमेर हद ४० वर्ष हुनेछ। रासस सेवामा कार्यरत स्थायी कर्मचारीलाई उमेर हद नलाग्ने सूचनामा उल्लेख छ।

न्यूनतम शैक्षिक योग्यता

समाचार सेवाका तह ८ पदका लागि आमसञ्चार तथा पत्रकारिता वा कुनै विषयमा स्नातकोत्तर तह उत्तीर्ण गरी समाचार संकलन तथा सम्पादनसम्बन्धी अनुभव आवश्यक छ।

समाचार सेवाका तह ६ पदका लागि आमसञ्चार तथा पत्रकारिता विषयमा स्नातक वा कुनै विषयमा स्नातक तह उत्तीर्ण गरी समाचार संकलन तथा सम्पादनसम्बन्धी अनुभव आवश्यक हुनेछ।

अर्थ तथा प्रशासन समूहका तह ६ पदका लागि स्नातक तह वा सो सरह उत्तीर्ण हुनुपर्नेछ। प्राविधिक समूहको अधिकृत कम्प्युटर पदका लागि कम्प्युटर इन्जिनियरिङ, कम्प्युटर विज्ञान वा सूचना प्रविधि विषयमा स्नातक तह वा सो सरह उत्तीर्ण हुनुपर्नेछ।

तह ४ को समाचार सेवाका पदमा आवेदन दिन आमसञ्चार तथा पत्रकारिता विषयसहित प्रमाणपत्र तह/कक्षा १२ वा सो सरह उत्तीर्ण हुनुपर्नेछ। पत्रकारितासम्बन्धी तालिम तथा समाचार संकलन/सम्पादन अनुभव भएका उम्मेदवारलाई सूचनामा तोकिएबमोजिम मान्यता दिइनेछ। अर्थ तथा प्रशासन समूहको तह ४ सहायक पदका लागि प्रमाणपत्र तह/कक्षा १२ वा सो सरह उत्तीर्ण हुनुपर्नेछ।

परीक्षा कहाँ र कसरी हुन्छ ?

परीक्षा केन्द्र काठमाडौं तोकिएको छ। लिखित परीक्षा लोक सेवा आयोगबाट सञ्चालन हुनेछ। लिखित परीक्षा मिति लोक सेवा आयोगबाट निर्धारण भएपछि जानकारी गराइनेछ। पदअनुसार लिखित, प्रयोगात्मक, कम्प्युटर सीप परीक्षण र अन्तर्वार्ता हुने सूचनामा उल्लेख छ।

२३ पदमा बढुवा सम्बन्धी सूचना पनि प्रकाशित

राससले कार्यक्षमता मूल्याङ्कनद्वारा हुने बढुवाका लागि पनि २३ पदमा सूचना प्रकाशित गरेको छ। यो सूचना राससमा कार्यरत योग्य कर्मचारीका लागि हो। सूचना प्रकाशित भएको मितिले ३० दिनभित्र तोकिएको ढाँचामा आवेदन दिनुपर्नेछ।

बढुवा सूचनामा समावेश पदहरू यसप्रकार छन्:

बढुवा आवेदनका लागि अधिकृत स्तरका पदमा रु. १,२०० र सहायक स्तरका पदमा रु. ६०० दस्तुर तोकिएको छ।

राससले न्यूनतम योग्यता नपुगेको, तोकिएको विवरण नखुलेको, आवश्यक प्रमाणपत्र नजोडिएको वा परीक्षा दस्तुर नबुझाएको आवेदन स्वीकार नगरिने जनाएको छ।