विदेशमा रहेका नेपाली नागरिक र उनीहरूका परिवारलाई लक्षित गर्दै परराष्ट्र मन्त्रालयअन्तर्गत कन्सुलर सेवा विभागले ‘मोफा मित्र’ मोबाइल एप सञ्चालनमा ल्याएको छ।

विदेशमा रहेका नेपाली समस्यामा परे, सम्पर्कविहीन भए, अलपत्र परे वा उद्धार आवश्यक परे अब परिवारका सदस्यले एपमार्फत नै जानकारी तथा निवेदन दर्ता गर्न सक्नेछन्। त्यस्तै विदेशमा मृत्यु भएका नेपालीको शव नेपाल ल्याउने प्रक्रिया, बीमा तथा क्षतिपूर्ति सम्बन्धी काम र अन्य कन्सुलर सेवाका लागि पनि एपबाटै समन्वय गर्न सकिने विभागले जनाएको छ।

यस एपबाट प्रयोगकर्ताले गुनासो दर्ता गर्ने, सेवा अनुरोधको अवस्था हेर्ने, आवश्यक जानकारी तथा सूचना पाउने र सम्बन्धित नेपाली दूतावास वा नियोगसँग सम्पर्क गर्न सक्नेछन्। एप विशेषगरी वैदेशिक रोजगारी, अध्ययन, व्यवसाय वा अन्य कारणले विदेशमा रहेका नेपाली र उनीहरूका परिवारका लागि उपयोगी हुने अपेक्षा गरिएको छ।

कन्सुलर सेवा विभागका अनुसार ‘मोफा मित्र’ एप एन्ड्रोइड र आईओएस दुवै मोबाइलमा उपलब्ध छ। Android प्रयोगकर्ताले Google Play Store बाट र iPhone प्रयोगकर्ताले Apple App Store बाट एप डाउनलोड गर्न सक्नेछन्।

विदेशमा रहेका नेपाली नागरिक, उनीहरूका परिवार तथा वैदेशिक रोजगारीमा जाने तयारीमा रहेका व्यक्तिहरूले यो एप मोबाइलमा राख्दा आपत्कालीन अवस्थामा छिटो सरकारी निकायसँग सम्पर्क गर्न सजिलो हुन सक्छ।

एपबाट लिन सकिने मुख्य सेवा

विदेशमा समस्यामा परेका नेपालीको खोजतलास तथा उद्धारका लागि निवेदन दिन सकिनेछ। विदेशमा मृत्यु भएका नेपालीको शव नेपाल ल्याउने प्रक्रियामा सहजीकरण माग्न सकिनेछ। बीमा, क्षतिपूर्ति तथा अन्य कन्सुलर सेवाबारे जानकारी र समन्वय गर्न सकिनेछ। साथै, नेपाली दूतावास/नियोग, ट्राभल एड्भाइजरी, बारम्बार सोधिने प्रश्न र गुनासो व्यवस्थापनसम्बन्धी सेवा पनि एपमार्फत उपलब्ध हुनेछ।

सरकारले प्रविधिको प्रयोगबाट कन्सुलर सेवा छिटो, सहज र नागरिकमैत्री बनाउने उद्देश्यले एप सञ्चालनमा ल्याएको हो।