प्रविधिक तथा व्यवसायिक तालिम परिषद् (CTEVT) ले देशभरका ३ हजार ४ सय ९७ विद्यार्थीहरूका लागि ठूलो संख्यामा छात्रवृत्तिको अवसर खुलाएको छ। 

परिषद्ले देशैभरका आंगिक, साझेदारी, सामुदायिक र निजी शिक्षण संस्थाहरूमा उपलब्ध कुल ३,४९७ सिटमा छात्रवृत्तिका लागि भर्ना खोलेको हो. 

इच्छुक विद्यार्थीहरूले रु. १,०००/- आवेदन शुल्क बुझाई २०८३ वैशाख २९ गतेदेखि जेठ १२ गते राति ११:५९ बजेसम्म अनलाइनमार्फत फाराम भर्न सक्नेछन्.

योग्यताको हकमा, नर्सिङ कार्यक्रमका लागि एसईईमा अनिवार्य गणित, अंग्रेजी र विज्ञान विषय लिई न्यूनतम २.० GPA र अन्य कार्यक्रमका लागि न्यूनतम १.६ GPA प्राप्त गरेको हुनुपर्ने प्रावधान छ. छात्रवृत्ति सिटहरू मध्ये ५० प्रतिशत साधारण र बाँकी ५० प्रतिशत लक्षित वर्गका लागि छुट्याइएको छ, जसमा महिलालाई ३३%, आदिवासी जनजातीलाई १५%, र मधेसी समुदायलाई १२% लगायतका आरक्षणको व्यवस्था गरिएको छ. सबैभन्दा बढी सिट संख्या सिभिल इन्जिनियरिङ (६४० सिट), जनरल मेडिसिन (४४६ सिट) र फार्मेसी (३४१ सिट) मा रहेको छ । कुल ४१ फरक फरक विषयहरुको डिप्लोमा अध्ययनका लागि विद्यार्थीले आवेदन दिन सक्नेछन् । 

आवेदन दिँदा शैक्षिक योग्यता, नागरिकता वा जन्म दर्ताको प्रमाणपत्र र लक्षित वर्गको हकमा सम्बन्धित निकायको सिफारिस पत्र स्क्यान गरी अपलोड गर्नुपर्ने सूचनामा उल्लेख छ ।

CTEVT छात्रवृत्ति आवेदन दिने तरिका

१. वेबसाइटमा जाने: सबैभन्दा पहिले CTEVT को परीक्षा नियन्त्रण कार्यालयको आधिकारिक पोर्टल www.ctevtexam.org.np मा जानुहोस्।

२. वर्गीकृत छात्रवृत्ति (Classified Scholarship) रोज्ने: होमपेजमा रहेको ‘Classified Scholarship Online Application’ लिंकमा क्लिक गर्नुहोस्। त्यहाँ आफूले पढ्न चाहेको तह (डिप्लोमा/प्रमाणपत्र) छनोट गर्नुपर्ने हुन्छ।

३. नयाँ एकाउन्ट बनाउने (New User Registration): यदि पहिलो पटक भर्दै हुनुहुन्छ भने ‘New User’ मा गएर आफ्नो नाम, मोबाइल नम्बर र इमेल राखेर रजिस्टर गर्नुहोस्। त्यसपछि तपाईंको मोबाइलमा एउटा ‘Username’ र ‘Password’ आउनेछ।

४. आवेदन शुल्क भुक्तानी (Payment): फारम भर्नुअघि तोकिएको आवेदन शुल्क बुझाउनुपर्छ। यो भुक्तानी Khalti, eSewa वा ConnectIPS जस्ता डिजिटल वालेटबाट अनलाइन नै गर्न सकिन्छ। भुक्तानी सफल भएपछि मात्र फारम खुल्नेछ।

५. व्यक्तिगत र शैक्षिक विवरण भर्ने:

• आफ्नो फोटो र स्क्यान गरिएको हस्ताक्षर अपलोड गर्नुहोस्।
• नागरिकता वा जन्मदर्ता प्रमाणपत्रको स्क्यान कपी राख्नुहोस्।
• एसईई (SEE) वा एसएलसी (SLC) को मार्कसिट र क्यारेक्टर सर्टिफिकेट अपलोड गर्नुहोस्।
• यदि तपाईं लक्षित वर्ग (दलित, जनजाति, अपाङ्गता, दुर्गम आदि) बाट भर्दै हुनुहुन्छ भने सम्बन्धित निकायबाट प्रमाणित सिफारिस पत्र अनिवार्य अपलोड गर्नुपर्छ।

६. विषय र शिक्षण संस्था छनोट गर्ने: तपाईंले कुन विषय पढ्न चाहनुभएको हो र कुन प्रदेशमा रहेका शिक्षण संस्थामा पढ्न चाहनुभएको हो, सोही अनुसार प्राथमिकता (Priority) क्रम मिलाएर छनोट गर्नुहोस्।

७. प्रिन्ट र सुरक्षित राख्ने: सबै विवरण भरिसकेपछि एकपटक राम्ररी रुजु (Review) गर्नुहोस् र ‘Submit’ गर्नुहोस्। फारम बुझाएपछि ‘Admit Card’ जेनेरेट हुन्छ, जसलाई प्रिन्ट गरेर वा सुरक्षित डाउनलोड गरेर राख्नुहोस्। यही प्रवेश पत्र लिएर पछि परीक्षा दिन जानुपर्ने हुन्छ।

केही आवश्यक कागजातहरू:

• हालसालै खिचिएको पासपोर्ट साइजको फोटो।
• एसईई/प्रमाणपत्र तहको लब्धांक पत्र (Grade Sheet)।
• सम्बन्धित सरकारी विद्यालयबाट अध्ययन गरेको सिफारिस (सरकारी कोटाका लागि)।
• लक्षित वर्ग खुल्ने प्रमाणित डकुमेन्ट।

त्यस्तै, काठमाडौँ महानगरपालिकाले मातहतका संस्थागत विद्यालयहरूमा कक्षा ११ मा अध्ययन गर्न चाहने विद्यार्थीहरूलाई छात्रवृत्तिको अवसर खुला गरेको छ। इच्छुक विद्यार्थीहरूले आउँदो जेठ १ गतेदेखि १० गतेसम्म महानगरको अनलाइन पोर्टल entrance.kathmandu.gov.np मार्फत आवेदन दिन सक्नेछन्। यस छात्रवृत्तिका लागि जेठ १७ गते बिहान ८ बजेदेखि १० बजेसम्म लिखित परीक्षा सञ्चालन हुनेछ, जसमा कक्षा १० को पाठ्यक्रममा आधारित १०० वटा बहुवैकल्पिक प्रश्नहरू सोधिनेछन्। कोटा र परीक्षा केन्द्र सम्बन्धी विस्तृत जानकारी महानगरको आधिकारिक वेबसाइटमा उपलब्ध छ। 

महानगरपालिकाको नियम अनुसार प्रत्येक निजी विद्यालयले कक्षा ११ मा कुल भर्ना भएका विद्यार्थी संख्याको १० प्रतिशत सिट छात्रवृत्तिका लागि अनिवार्य छुट्याउनुपर्ने हुन्छ। कुन विद्यालयमा कति कोटा खाली छ र कुन विषयका लागि कति सिट 

उपलब्ध छ भन्ने विस्तृत विवरण महानगरको वेबसाइट kathmandu.gov.np मा राखिएको सूचीबाट हेर्न सकिनेछ।”