काठमाडौँ । नेपाल सरकार, श्रम, रोजगार तथा सामाजिक सुरक्षा मन्त्रालयले पश्चिम एसियाका विभिन्न मुलुकहरूमा लाग्दै आएको श्रम स्वीकृतिको अस्थायी रोकलाई हटाएको छ। वैदेशिक रोजगार विभागले आज एक सूचना जारी गर्दै रोकिएका देशहरूमा पुनः श्रम स्वीकृति दिन सुरु गरिएको जानकारी दिएको हो।

यसअघि पश्चिम एसियामा उत्पन्न विषम परिस्थितिलाई मध्यनजर गर्दै मन्त्रालयले २०८२ साल माघ १७ गते (मन्त्रिस्तरको निर्णयबाट) साउदी अरेबिया, युएई, कतार, कुवेत, बहराइन, ओमान, इराक, यमन, जोर्डन, लेबनान, टर्की र इजरायलमा श्रम स्वीकृति दिन अस्थायी रूपमा स्थगन गरेको थियो।

कुन देशको हकमा के निर्णय भयो?

• इराक: इराकको हकमा नेपाल सरकार मन्त्रिपरिषद्को २०८२ पुस ११ को निर्णयानुसार नै काम अगाडि बढ्ने विभागले जनाएको छ।

• अन्य मुलुकहरू: साउदी, युएई, कतार लगायत अन्य उल्लेखित देशहरूको हकमा भने व्यक्तिगत, संस्थागत र वैधानिकीकरण गरी सबै प्रकारका श्रम स्वीकृतिहरू पूर्ववत् अवस्थामा नै खुला गरिएको छ।

मन्त्रालयले २०८३ वैशाख ७ गते गरेको मन्त्रिस्तरीय निर्णयअनुसार सम्बद्ध सबैलाई जानकारी गराउँदै विभागले वैदेशिक रोजगारीमा जान चाहने श्रमिकहरूका लागि बाटो खुला गरेको हो। यो निर्णयसँगै लामो समयदेखि श्रम स्वीकृतिको पर्खाइमा रहेका हजारौँ नेपाली श्रमिकहरू लाभान्वित हुने देखिएको छ।