वैदेशिक रोजगारमा जानेहरूले अबदेखि पिसिआर रिपोर्ट र होटल क्वारेन्टाइन बस्नु नपर्ने भएको छ। कोरोना संक्रमण नियन्त्रण हुँदै गएपछि रोजगार गन्तव्य देशले कोरोना नियम पनि खुकुलो बनाउन थालेका कारण रोजगारीमा जानेले पहिले तोकिएका स्वास्थ्य मापदण्ड पूरा गर्नुनपर्ने भएको हो । 

 गत सातादेखि विदेशी कामदारका हकमा पीसीआर रिपोर्ट देखाउनुपर्ने र संस्थागत तथा होटल क्वारेन्टाइन बस्नुपर्ने नियम खारेज गरेका हुन् ।  यसअघि वैदेशिक रोजगारीमा जाँदा श्रमिकहरूले संस्थागत क्वारेन्टाइन तथा पिसिआर जाँचको खर्च आफैँले बेहोर्नुपर्ने हुन्थ्यो । यसरी, क्वारेन्टाइनका लागि २० देखि २२ हजार रूपैयाँ सम्म र पटक पटक पिसिआर जाँच गर्दा ८ देखि १० हजार सम्म खर्च लाग्ने गर्थ्यो ।  यसरी क्वारेन्टाइन र  पीसीआर गरि श्रमिकको ३० हजार भन्दा बढी  खर्च हुने गर्थ्यो । रोजगारदाता मुलुकहरूले यस्तो नियम ल्याएपछि श्रमिकहरूलाई राहत भएको छ । 

 अब वैदेशिक रोजगारीमा जानेहरूले रोजगारदाता देशहरूले स्वीकार गर्ने खोप लगाएको क्यूआर कोड देखाए पुग्ने भएको छ । वैदेशिक रोजगारीका प्रमुख गन्तव्य मुलुकमध्येको कतारले फेब्रुअरी २८ देखि लागू हुने गरी स्वास्थ्यका मापदण्ड परिमार्जन गरेको छ ।  नयाँ मापदण्डअनुसार खोपको मात्रा पूरा लगाएका कतारका नागरिक र कतारमा बसोबास गर्नेहरूले यात्रा गर्नुअघि पीसीआर परीक्षण गर्नुपर्ने र त्यहाँ पुगेपछि क्वारेन्टाइन बस्नुपर्ने नियम हटेको छ, भने कोरोनाको खोप लगाएकाहरूले पनि कतार पुगेको २४ घण्टाभित्र र्‍यापिड  एन्टिजेन परीक्षण भने गर्नुपर्नेछ । खोप नलगाएकाले भने कतार पुगेको पहिलो दिनमा  पीसीआर परीक्षण र पाँचौँ दिनमा र्‍यापिड  एन्टिजेन परीक्षण गर्नुपर्नेछ ।

 त्यस्तै, अर्को गन्तव्य मुलुक साउदी अरबले पनि कोरोना नियन्त्रण सम्बन्धी स्वास्थ्य मापदण्डलाई मार्च १२ देखि खुकुलो बनाएको छ । त्यसो त युनाइटेड अरब इमिरेट्स यूएईले रोजगारीका लागि यूएई प्रवेश गर्ने विदेशी श्रमिकका हकमा अनिवार्य गरिएको पीसीआर रिपोर्ट र होटल क्वारेन्टाइन पनि हटाएको छ, भने मार्च १ देखि लागू हुनेगरि यूएईले घरबाहिर वा सार्वजनिकस्थलमा अनिवार्य मास्क लगाउनुपर्ने नियम पनि हटाएको छ । 

मलेसियाली स्वास्थ्य मन्त्रालयले  मलेसिया जाने विदेशी कामदारले आफ्नो देशले मान्यता दिएको दुवै डोज खोप लगाएको भए पीसीआर परीक्षण र होटल क्वारेन्टाइन बस्नुपर्ने जनाएको छ, भने फाइजर, स्पुतनिक लाइट, स्पुतनिक भी, जोन्सन एण्ड जोन्सन, कोभिसिल्ड र एस्ट्राजेनेका लगायतका खोपलाई मान्यता दिएको छ । खोपको एउटा मात्र डोज लगाएका विदेशी कामदारले मलेसिया पुगेको एक साता दोस्रो डोज लगाउनुपर्ने व्यवस्था गरेको छ ।

 कुवेत सरकारले गत फेब्रुअरी २० देखि लागू हुने गरि कोरियाविरुद्धको खोपको पूरा मात्रा लगाएका यात्रुले प्रस्थान पूर्व र कुवेत पुगिसकेपछि गर्नुपर्ने अनिवार्य पीसीआर परीक्षण र क्वारेन्टाइनको नियम हटाएको छ ।

ओमानले भने विदेशी कामदारले कोरोनाको पीसीआर परीक्षण गर्नुनपर्ने व्यवस्था कायमै राखेको छ ।  बहराइन सरकारले पनि विदेशी कामदारका हकमा लागू गरेको अनिवार्य पीसीआर परीक्षण र होटल क्वारेन्टाइन बस्नुपर्ने नियम हटाएको छ । बहराइन सरकारले आठवटा  खोपलाई मान्यता दिएको छ ।  अहिले वैदेशिक रोजगारीका लागि नेपालबाट दैनिक ४ सय जना कामदार विभिन्न देश जाने गरेको वैदेशिक रोजगार विभागको तथ्यांकमा उल्लेख छ ।